पण.....

वाळला अश्रु चेहेऱ्यावरचा, हृदयात त्याच्या व्रण होता
'नाही' म्हणाली नाही ती, पण शेवटी एक 'पण' होता

दफन करतांना आठवणीही, पुरलं नाही खोल त्यांना
विसरण्याची शपथ घेतली, पण शेवटी एक 'पण' होता

होते शत्रू अन सोयरेही, नजरेत राग ना शिकवा त्यांच्या
आयुष्याची वही संपतांना, जन्मला सोनेरी एक क्षण होता

हुंडा मागून परततांना, कचऱ्यात माश्यांनी घेरलेला
पाकळीसम तलम गुलाबी, चिमुकलीचा एक भ्रुण होता

(भ्रुण - fetus)

पावसाची वाट पाहतांना, अर्धपोटी, दरिद्री आतुर होता
कारण त्यानं पेरलेला, आशेचा शेवटचा एक कण होता

- प्रमोद खाडिलकर
२९ मार्च २०११