अश्रू

क्षणार्धात धावून येतो
कधी उगवतो अश्रू ?

हसता हसता उन्मळतो
कुठल्या देठावरुन अश्रू ?

गेल्यावर तू, तोही जातो
चिडतो कुणावर अश्रू?
अखंड पाझर, अथक झरतो
कुठं विरतो अश्रू ?

फोडले जरी डोळे
संवेदनांच्या काट्यांनी
ठिबकत राहतं रक्तं वेगळं
वेगळाच वाहतो अश्रू

वेदनांच्या आभाळाला निरखत बसतो
फाटका एखादा आत्ममग्न
फकीर वेडा अश्रू

दुःखी जन्मतो का सांत्वनी हा?
तुझा असतो का माझा
का नसतो कधी कुणाचा अश्रू


प्रमोद (१९ मे २०१६)