लेग पीस

डोक्यात गोळी घातलेला कोणी
ओंडक्यासारखा आपटला जमिनीवर
काळजात चर्रर्र झालं
जेव्हा त्याचं डोकं आपटलं

भाकड होती ती वेदना
तो आधीच मेलेला होता
गोळी मेंदूत शिरतानाच 

गोळीचा वेग 
माझ्या सहवेदनेच्या वेगापेक्षा 
होता 
कितीक पटीने जास्त

तो आपटला
त्याक्षणी
मी होतो
एक प्रेक्षक फक्त
चिकन ६५ खाणारा

चिकन ६५ च्या गाड्यावरचा
उघडाबंब माणूस
भल्या मोठ्या कढईत
तळत होता
नुकत्याच मेलेल्या माणसाचा
लेग पीस

प्रमोद
१७ सप्टेंबर २०२०

Uninstall

टीव्ही बंद करावा तसा
कवी बंद करता येतो ! .......

नुकत्याच झालेल्या प्रयोगावरून झालंय सिद्ध

अगदी बंद नसेना का,
ऐरोप्लेन किंवा सायलेंट मोडवर तरी
नक्कीच टाकता येतो

अंत्ययात्रा, वरात
श्रावण, ग्रीष्म
सगळे ऋतू,
पाऊस, प्रेयसी,
खून आत्महत्या
ह्यांचे काव्यात्मक परिणाम
रोखणारा एखादा
अँटी इमोशन प्रोग्रॅम सुद्धा
डाउनलोड होत असेल
एखाद्या AI प्रणालीच्या मदतीने
.....परस्पर


फार काही बिघडलं नाहीये
कविपण जास्तच मेमरी खातं उगाच

म्हणजे काळ्या पांढऱ्या बायनरी
कवितांच्या कचऱ्याचा
उपयोग तसा विशेष नाहीच
कुणालाच तसं काही देणं घेणं नाहीये

उलट शांत वाटतंय

कसलेच नोटिफिकेशन नाहीत

अनइंस्टॉल करायचं बटन दाबलं
तर साधं विचारलं सुद्धा नाही
'Are you sure'


प्रमोद
27 ऑक्टोबर 2020

माझ्या कवितांना तोंड भरून दाद देणाऱ्याने
कॅंडी क्रशचं invite पाठवलंय
एका सांत्वनपर कवितेसोबत