द्वाड

संपतच नाहीत भास
कुणीतरी माझ्या पुढे, मागे
चालत असल्याचे
सतत

एका विशाल पिंपळाच्या
थंड छायेखाली
विश्रांती घेत असताना

माझ्यातलं
ईश्वरी काही
माझ्याकडं प्रेमानं बघत

म्हणालं
पारंब्यांवर
फिरणाऱ्या
मुंगीला

कितीदा सांगितलं ह्याला
जे आहे ते इथंय
पायाला टेकणाऱ्या
मातीच्या कणांत
शरीराला घासणाऱ्या
वाऱ्याच्या स्पर्शात
खळाळणाऱ्या
पाण्याच्या घोषात
तळपणाऱ्या
सूर्याच्या प्रकाशात

आणि हा
द्वाडपणे
धावत सुटतो
मागे पुढे

माझा
हात सोडून

प्रमोद
२३-०७-२०२०

व्यस्त

कृष्ण
निष्काम कर्माच्या
शिकवणुकीला अनुसरून
देत राहिला
धडका माझ्या
बंद दरवाज्यावर

तुका
गुणगुणत
चंद्रभागेवर तरंगत
गुंजी घालत राहिला
भोवताली

रामदास, सावरकर
विवेकानंद, गोनीदा
आणि
कुणी कुणी

मी मात्र
कॉन्फरेन्स मध्ये
माणसाकडे पाहण्यापेक्षा
गळ्यातल्या टॅगकडे पाहात राहतो
शेवटी
वहीत नोंदी करतो
माणसांची नव्हे तर
त्यांच्या affiliations ची
तसाच

तसाच
मी शोधत राहिलो
त्यांच्या गळ्यातले टॅग
कृष्ण, तुका.....
कोणीच न्हवते घातले
टॅग

मग मी बोलत राहिलो
इतरच कुणा कुणाशी
affiliations पाहून

हे सगळे
पोहोचू पाहत होते
माझ्यापर्यंत
त्यांना मिळत होतं
उत्तर
एकच

'ह्या मार्गावरच्या
सगळ्या लाईनी
व्यस्त आहेत"


प्रमोद
०१ जुलै २०२०