हरवणं

तो मुलगा निघालाय
हरवायला
निरागस आहे तो
त्याला सोप्पं वाटतंय
हरवणं

जितक्या विभिन्न दिशांना
भरकटता येईल
तितका भरकटतो तो
त्याच्या निर्हेतुक फरफटीत
सगळ्यांना जाणवतोच हेतू
हरवण्याचा


कित्येकदा पळून गेलाय तो

पण दरवेळी सापडलाय

हरवल्यावर तो वागत राहतो
हरवल्यासारखाच सारखा


असाच एकदा सापडल्यावर
कुणी त्याला पकडून न्हेताना
तिथेच बसलेला साधू म्हणाला
"हरवण्यासाठी सापडणं कळायला हवं
हरवणं हा स्थायीभाव व्हायला हवा
सापडलेलो असतानाचा असतो तसा

मग तो सापडणं शोधायला लागला

आणि मग एक दिवस
त्याच्या ओळखीच्या भवतालातच
हरवला
कुणीच शोधू शकत नाहीये त्याला
त्याच्या इच्छेविरुद्ध

प्रमोद 

१९ एप्रिल २०२३