वाहणं

घरासमोरच्या ओढ्यात
सोडून दिलेली नाव
पत्र बनून परत आली

तरंगण्याचा आनंद, वेगाचा उन्माद
आकस्मित हेलकावे, बुडण्याची भीती
सगळ्यांच्या नोंदी होत्या त्या पत्रात
ओलसर होता कागद जरासा
वाळायला टेबलावर ठेवला
तर तो
पुन्हा नाव बनून गेलाय
पुन्हा पाऊस पडतोय
पुन्हा ओढा वाहतोय

आणि मी?
मी तसाच आहे स्थिर


वाहून जाणाऱ्या नावेकडं पाहत
मला पडलाय प्रश्न
माझ्या वाहण्याचं काय?


प्रमोद
१४ जुलै, २०२१