स्पॅम

मला मिळाला आहे तिचा फोन नंबर
पण मी खूप खुश असल्याचा आव आणत,
'खुश खबर! तुम्हाला १० लाखाचं preapproved कर्ज मंजूर झालंय!!!!'
म्हणत जे फोन करतो
त्यातल्या कोणीतरी
स्पॅम मध्ये टाकलंय मला Truecaller वर

स्पॅम म्हणून आलेल्या फोनवर
'मला तू खूप आवडतेस' असं सांगितल्यावर
ती ऐकून तरी घेईल का?
का काही न ऐकताच,  
'I am not interested?'
म्हणत कट करून टाकेल?
का करेल एक क्षण विचार
हा कोणी chatbot होऊन गेलेला मनुष्य bot नसून असेल
खरा खुरा जिवंत माणूस

माझ्याकडं नाहीये मोठी लिस्टहि नाहीये
ज्यात तिच्या सारख्या अनेकींचे
नंबर लिहिलेले असतील

नवीन घेतलेल्या नंबरवरून
आता फोन करतोय तिला  
टाकलाय तिचा नंबर कीपॅड वर,
फोन लावतांना उगाच
सवयीप्रमाणे, उफाळून येतोय,
तो खोटा आनंद
स्पॅम कॉल करतांना असतो तसा  
जमा होतायेत तोंडात शब्द
'खुश खबर! हाच तो क्षण जेव्हा तुम्हाला मिळाली आहे तुमच्या आयुष्यातली खरी खुरी प्रीती!'

मी सांगतोय स्वतःला
हे नाहीये तसं,
ह्या दुविधेत असतांनाच
ती उचलते फोन
मी स्तब्ध होऊन जातो काही क्षण
'हॅलो, हॅलो..... कोण बोलतंय?'
तिला ऐकू जात असतील माझे
भरकटणारे श्वास,
छातीतली धडधडही ....
पाठीमागून दुसऱ्याच कोणाचा तरी
ऐकू येतोय आवाज
'कट करून टाक गं, स्पॅम असेल'
ती ऐकत राहाते, नीट
'नाही, इथं कुणीतरी, काहीतरी
......... खरंय'
ती नुसतं ऐकत राहते

मी घेत राहतो नुसते श्वास!