फ्लाय ओव्हर

नेहमी ज्या ठिकाणी येऊन
अडलेपण यायचं
त्यातून उद्भवायचा वैताग
निर्माण व्हायची कटुता
त्या नात्यावर मी सरळ
एक फ्लाय ओव्हर बांधून टाकलाय


आता सरळ ओलांडून जातो मी
त्या नात्याला
सुसाट


परवा असाच विचारांच्या गुंत्यात 
फ्लाय ओव्हर घ्यायचा चुकला
खूप दिवसांनी फ्लाय ओव्हरच्या
खालची दृश्यं बघितली


खूप हळहळलो
रयाच गेली होती त्या चौकाची
काळाच्या ओघात टाकाऊ गोष्टींची
गर्दी,
विझुन गेलेल्या डोळ्यांची लोकं
नुसतीच टकामका बघत होती
माझ्या चकचकीत गाडीकडे


पुन्हा डोळे फेरत होती
कारण
त्या काळ्या काचेत त्यांना दिसत होती
त्यांच्याच डोळ्याखालची वर्तुळं


फ्लाय ओव्हर खालून
पुन्हा राजमार्गाला लागलो
शोधले मोबाईल मधे काही नंबर


आणि तोडायला घेतले
फ्लाय ओव्हर


प्रमोद

१३ जून २०२२